حقوق

د حقوقو دیپارتمنت د پوهنتون له مهمو علمي څانګو څخه دی چې د حقوقو او سیاسي علومو د پوهنځي په چوکاټ کې فعالیت کوي. دا دیپارتمنت د متخصص، متعهد او باخبره کادرونو د روزنې او تربیې په موخه تأسیس شوی دی، څو د هېواد په حقوقي، عدلي او قضایي برخو کې خدمت وکړي. فارغان یې کولای شي په عدلي او قضایي ادارو، څارنوالیو، محکمو، د عدلیې وزارت او نورو ارګانونو کې چې د قانون او عدالت سره تړاو لري، اغېزناک رول ولوبوي. په دې دیپارتمنت کې محصل هغه وخت فارغ ګڼل کېږي چې د څلور کلنې دورې (اته سمسترونه) په ترڅ کې له ۱۳۶ تر ۱۵۸ کریډیټه په بریالیتوب سره بشپړ کړي او د علم، مهارت او سلوک اړین علمي او اخلاقي شرایط ولري. اوس مهال، دیپارتمنت حقوق څلور تنه دایمي علمي کادرونه لري چې د ماستري په کچه تخصصي پوهه، مسلکي تجربه او اغېزمنې تدریسي وړتیاوې لري، او د محصلانو د فکري ودې او د زده‌کړې د کیفیت د لوړولو لپاره ارزښتمن خدمتونه وړاندې کوي. په ۱۴۰۳ د پسرلي سمستر کې، دیپارتمنت حقوق له سل څخه ډېر محصلان لري چې په مینه او هڅه د حقوقي او مسلکي علومو په زده‌کړه بوخت دي. دا دیپارتمنت د وزارت د لوړو زده‌کړو نوی نصاب تطبیقوي چې د افغانستان د ټولنې او عدلي نظام اړتیاوو ته ځواب وايي او له معاصرو حقوقي معیارونو سره سمون لري. دیپارتمنت حقوق هغه محصلان فارغوي چې لاندې علمي او اخلاقي شرایط ولري: فارغ باید د لسانس په کچه د قوانینو د تحلیل او تفسیر وړتیا، د هېواد د عدلي نظام پېژندنه، د حقوقي مفاهیمو تسلط، او د حقوقي شخړو د حل مهارت ولري، څو د عدالت او قانون په خدمت کې د متخصص حقوقي کادر په توګه کار وکړي. فارغ د دې دیپارتمنت هغه څوک دی چې د خپلو تخصصي او مسلکي مضامینو له لارې د عدالت غوښتنې روحیه، د هېواد د حقوقي نظام درناوی، د اسلامي او انساني ارزښتونو رعایت، او د مساوات او انصاف اصولو ته ژمنتیا زده کړي وي. هغه باید له هر ډول تبعیض او تعصب لرې وي او د ټولنیز عدالت، دولت‌سازۍ او ملت‌سازۍ په برخه کې فعال رول ولوبوي.